Извор: Кирил Ќамилов, „Поетот-борец Ганчо Хаџипанзов“ во „Културен живот“, бр. 7, септември 1964, 31 стр.
Препев: Кирил Ќамилов, од француски јазик
Техничка обработка: Здравко Савески
Онлајн верзија: мај 2015
Вие не знаете другари мои
вие не знаете дека во близината на нашата фабрика
нашата фабрика за вентилатори
танцуваат, танцуваат и празнуваат „во Девили“
Дека нашата фабрика расне, расне за бунт
Расне под сенките на дворецот на Малмезон
Бунт
како дел од историјата
Вие знаете или не знаете
другари мои
дека тука танцуваат деноноќно
танцуваат три изгладнети смени
Танци како танци ора народни и мачни
луѓе како луѓе
танцуваат нашите работници врз обрачи зелени
танцуваат за да „ажустрираат“
челични вентилатори на Париз
Вие не знаете, вие не знаете
другари мои
вие не знаете дека под удари на тешки чекани
танцуваат забите на машината што граби
и раце и нозе на работници во безлебие
работници – болка и бес,
болка на самосиндикалисти, анархисти, комунисти
на емигранти од Италија на Мусолини
и од Германија на Хитлер
Робови гладни – прегладнети
Раце испукани на бездомници
емигранти од цел свет
загрнати со бездомните од париските „Тоди“...
Тука некогаш под сенките на Малмезон
во близина на нашата фабрика
танцувала француската империја
танцувал и Бонапарта, и сите наполеоновци
и сите дами и мадами
и Помпадур, и Мадам Сен-Жан
и „Дамата со камелиите“ на Дима.